قوانين مجتمع دكتور لود – اقرأ قبل ما تشارك
اهلا بيك في مجتمع دكتور لود، المكان اللي جمعنا فيه كدكاترة اسنان عشان نتكلم في كل جديد في المهنة… كورسات، شركات، ماتريال، أخبار، واستشارات مهنية بين الزمايل في مصر والعالم العربي والدولي.
عشان نفضل دايما مجتمع محترم ومفيد، اتفقنا على شوية قوانين لازم نمشي بيها كلنا:
١. الاحترام المتبادل
- دايما خلي كلامك مهني ومحترم، حتى لو رأيك مختلف.
- الهجوم الشخصي، السخرية، او الإهانة لأي عضو مش مقبولة بأي شكل.
- النقاش الصحي مطلوب، لكن بدون تجاوزات.
٢. المعلومات اللي بتشاركها
- لو بتتكلم عن كورس، ماتريال، جهاز، او شركة… اتأكد من صحة اللي بتقوله، ويفضل تدعم كلامك بدليل زي: صورة، شهادة، رابط، أو تجربة موثوقة.
- ممنوع نشر إشاعات او معلومات مغلوطة من غير ما تكون متأكد منها.
٣. النزاهة العلمية
- احرص دايما ان اي معلومة علمية تكتبها تكون دقيقة ومن مصدر موثوق.
- لو بتجاوب على استشارة من زمايلك، لازم تكون متأكد من إجابتك او على الأقل تقول انها “على حسب خبرتك” او تضيف لينك للمصدر لو متاح.
- اي محاولة لتضليل الزمايل او نشر معلومات خاطئة عمدا تعتبر مخالفة جسيمة.
٤. الصور والفيديوهات
- انشر بس صور وفيديوهات ليها علاقة بالموضوع ومناسبة للنقاش.
- ممنوع صور المرضى او بياناتهم لو فيها اي معلومات شخصية من غير إذن مكتوب.
٥. الإعلانات والمصالح الشخصية
- ممنوع الإعلانات التجارية العشوائية او الدعائية اللي ملهاش علاقة بالنقاش.
- لو عندك عرض او اعلان شايف انه مهم ومفيد للزمايل، ابعته للإدارة الأول لمراجعته.
٦. سرية المجتمع
- اي حاجة شخصية او مهنية الناس بتحكيها هنا لازم تفضل هنا.
- ممنوع تخرج بيانات او تفاصيل عن زمايلك برا الجروب.
٧. لو شفت مخالفة أو إساءة
لو لاحظت اي إساءة، مخالفة للقوانين، او محتوى مش مناسب، ابعتهلنا فورا:
📧 إيميل: community@drlod.com
📱 واتساب: +201507746658
واحنا هنتصرف فورا ونرد عليك.
٨. صلاحيات الإدارة
- الإدارة ليها الحق تشيل اي محتوى مخالف او مسيء من غير الرجوع لصاحبه.
- ممكن يتم توجيه تحذير، إيقاف مؤقت، او حتى حظر نهائي لو تكررت المخالفات.
- القوانين دي ممكن تتحدث في اي وقت حسب الحاجة.
❤️ وفي النهاية…
وجودك هنا قيمة كبيرة. ساعدنا نحافظ على مكان نظيف ومفيد لكل زمايلنا… ناقش، اسأل، جاوب، وشارك خبرتك بما يفيد.
شكرا إنك معانا في مجتمع دكتور لود 🌟
